ஸ்ரீலங்கா முஸ்லிம் காங்கிரசின் அதியுயர்பீடக் கூட்டம் அவசரமாக நாளை
மறுதினம் வெள்ளிக்கிழமை கூடவுள்ள நிலையில், கட்சியின் அனுமதியின்றி
அமைச்சுப் பதவியைப் பெற்ற கட்சியின் தவிசாளர் பஷீர் சேகுதாவூதை அதிரடியாகக்
கட்சியிலிருந்து நீக்க முஸ்தீபு செய்யப்பட்டு- அதற்கான வியூகங்கள்
இரகசியமான முறையில் முடுக்கிவிடப்பட்டுள்ளன எனத் தெரிய வருகின்றது.
இது தொடர்பில் கட்சியின் மிக முக்கியமான சிலர் நேற்று முன்தினம் கூடி ஆராய்ந்துள்ளனர் என அறிய முடிகின்றது.
இதன் பிற்பாடே கட்சியின் தலைவரான அமைச்சர் ரவூப் ஹக்கீம்
இந்தியாவிலிருந்தவாறு செயலாளர் நாயகம் ஹசனலியுடன் தொடர்பு கொண்டு
வெள்ளிக்கிழமை அதியுயர்பீடக் கூட்டத்தைக் கூட்டுமாறு பணித்ததாகத்
தெரிவிக்கப்படுகின்றது.
கிழக்கு மாகாண சபைத் தேர்தலின்போது கட்சியினதும், தலைமையினதும்
அனுமதியின்றி பிரதியமைச்சர் பதவியை பஷீர் சேகுதாவூத் இராஜிநாமாச் செய்து
தலைமைக்கு நெருக்கடி கொடுத்ததிலிருந்து நேற்று முன்தினம் வரை அவ்வாறான
நெருக்கடிகளைத் தொடர்ந்தும் செய்து வந்துள்ளார்;
இனியும் இவர் விடயத்தில் பொறுமை காக்கக்கூடாது என்று கட்சியின்
பெரும்பாலான உயர்பீட உறுப்பினர்கள் தலைவர் ரவூப் ஹக்கீமை வலியுறுத்தத்
தொடங்கியுள்ளனர்.
மட்டு. மாவட்டம் மு.காவிடமிருந்து விலகிச்செல்வதற்கு பஷீர் சேகுதாவூதே
காரணம் என்றும் அவரை உடனடியாகக் கட்சியிலிருந்து இடைநிறுத்த வேண்டும்
என்றும் மேற்படி உறுப்பினர்கள் தலைவரிடம் வலியுறுத்திக்
கேட்டுள்ளதாகவும் அறிய முடிகின்றது.
இவ்வாறான பரபரப்பான சூழ்நிலையிலேயே நாளை மறுதினம் உயர்பீடக் கூட்டம்
இடம்பெறவுள்ளது. இக்கூட்டத்தின் இறுதியில் பஷீர் சேகுதாவூதை அமைச்சுப்
பதவியிலிருந்து விலகுமாறு கோருவது என்றும் அதனை அவர் மறுக்கும்
பட்சத்தில் அன்றே அவரை கட்சியிலிருந்து நீக்கும் முடிவை எடுப்பதென்றும்
தீர்மானிக்கப்பட்டுள்ளதாக உயர்பீட உறுப்பினர் ஒருவர் குறிப்பிட்டார்.
இது இவ்வாறிருக்க, அமைச்சர் பஷீர் சேகுதாவூதின் தனிப்பட்ட ஆளணியில்
கட்சி உறுப்பினர்கள் எவரும் இணைந்துகொள்ளக்கூடாதென மு.கா. கண்டிப்பான
உத்தரவை பிறப்பித்துள்ளதாக நம்பகரமாகத் தெரியவருகின்றது.
அத்துடன், ஏனைய மு.கா. எம்.பிக்கள் தாங்கள் என்றும் தலைவர் ரவூப்
ஹக்கீமுடனேயே இருப்போம் என்ற உறுதிமொழியை வழங்கியுள்ளதாகவும்
தெரிவிக்கப்படுகின்றது.
No comments:
Post a Comment